कपिल श्रेष्ठ, साँखु
हरेक वर्षको साउन १५ झैँ यो वर्ष पनि मणिचुड सामुदायिक विद्यालय, साँखुका प्रधानअध्यापक श्रीराम सरले विद्यालयमा सञ्चालित मणिचुड सामुदायिक शैक्षिक बचत कार्यक्रमको साधारण सभामा भाग लिन मलाई टेलिफोन मार्फत निमन्त्रणा दिनुभयो । म आफू कार्यरत संस्था सनराईज एजुकेशन फाउण्डेशनको तर्फबाट उक्त बचत कार्यक्रमको सदस्य तथा अनुगमनकर्ताको रुपमा तीन वर्षदेखि सक्रिय छु । अरु वर्ष भन्दा यो वर्ष विद्यालयले विशेष कार्यक्रमहरुसाथ साधारण सभाको कार्यक्रम आयोजना गरेको रहेछ । यही कार्यक्रमको अवसर पारेर माननीय सभासद झक्कु प्रसाद सुवेदीले सांसद कोषबाट करिव ८५,०००।– (पचासी हजार) रुपैयाँ बराबरको तीन थान डेस्कटप कम्प्युटर विद्यालयलाई हस्तान्तरण गर्नुभएको थियो ।
कार्यक्रममा माननीय सभासद सुवेदीले देश र शिक्षाको विकासका लागि प्राविधिक शिक्षाको महत्वपूर्ण स्थान रहने हुँदा राज्यले प्राविधिक शिक्षामा प्रशस्त लगानी गर्नुपर्ने बताउनु भयो । कार्यक्रममा सोही विद्यालयका व्यवस्थापन समिति अध्यक्ष देवकृष्ण के.सीले विद्यालयका बालबालिकाको चाहना अनुसार अब कम्प्युटर शिक्षा प्रदान गरिने हुँदा उनीहरु आजको सूचना सञ्चारयुक्त शिक्षाबाट अब टाडा नरहने बताउनु भयो । उहाँले विद्यालयमा यस्ता किसिमका सहयोगहरु निरन्तर जुटाइदिन सहयोग गरेकोमा सहयोगी संस्था सनराइज एजुकेशन फाउण्डेशनलाई धन्यवाद दिनुभयो ।
कार्यक्रममा शिक्षाका लागि राष्ट्रब्यापी अभियानका स्टेरिङ्ग कमिटिका सदस्य पुष्पराज पौडेलले आजको शिक्षालाई सिद्धान्तमा मात्र सीमित नगरी प्रविधिसँग जोडनुपर्ने वर्तमान समयको आवश्यकता भएको बताउनुभयो । उहाँले नेपालका सबै सभासदहरुले आफूले उपयोग गर्न पाउने सांसद कोषबाट नेपालका दूरदराजमा रहेका विद्यालयहरुमा पनि यस्ता खाले सहयोग कार्यक्रमहरु सञ्चालन गर्न सकेमा विद्यार्थीहरुले केही हदसम्म भएपनि आधुनिक प्राविधिक शिक्षाको सुरुवात हुने बताउनु भयो ।
कार्यक्रममा विद्यालयका प्रधानअध्यापक श्रीराम कार्कीले शैक्षिक बचत कार्यक्रमले विद्यालयको आय आर्जन कार्यक्रमलाई दिगोपना थपेको र समुदायको सानो तिनो समस्या पनि आफ्नै विद्यालयको बचत समूहबाट समाधान गर्न सकेकोले अभिभावकहरुको विद्यालय प्रति चासो बढेको बताउनुभयो । उक्त बचत कार्यक्रमले सञ्चालन भएको तेस्रो वर्षमा २ लाख १८ हजार रुपैया निक्षेप संकलन गरेको र २ लाख १५ हजार रुपैयाँ बराबर ऋण लगानी गरेको बताउनुभयो । अहिले बचत समूहमा अभिभावक, शिक्षक, विद्यार्थी र अन्य गरी कुल १ सय ३१ जना साधारण सदस्यहरु रहेको र यो संख्या बढ्ने क्रम पनि निरन्तर रहेको जानकारी दिनुभयो ।
यस विद्यालयमा सनराइज एजुकेशन फाउण्डेशनले विद्यार्थीहरुका लागि दिवा खाजा कार्यक्रम, भवन मर्मत कार्यक्रम, छात्रवृत्ति तथा शैक्षिक सामाग्रीको सहयोग कार्यक्रम संचालन गर्दै आएको छ । त्यसका साथै हालसालै विद्यार्थीहरुका लागि विद्यालय पोशाक पनि सहयोग गरिएको छ । विद्यालयमा विद्यार्थीलाई आकर्षित गरी भर्ना भएका विद्यार्थीलाई टिकाइ राख्नका लागि आगामी दिनमा अन्य नयाँ कार्यक्रमहरु पनि सञ्चालन गरिने भएको छ । शहरदेखि धेरै टाढा नभए पनि विकासको दृष्टिले निकै पछाडि परेको यस स्थानमा रहे पनि मणिचुड प्राथमिक विद्यालयलाई शिक्षा क्षेत्रमा निकै सफलता हासिल गर्न सफल एक नमूना विद्यालय मान्न सकिन्छ ।
No comments:
Post a Comment